आइसोलेसनमा बस्‍नेहरुले पनि टीका लगाएर मनाए दसैं


इटहरी आइसोलेसनमा बसेकी ज्येष्ठ वृद्धाले आफूसँगै आइसोलेसनमा बसेकाहरुलाई टीका लगाइ दिँदै । तस्बिर: कान्तिपुर

प्रकाशित: कार्तिक ११, मंगलबार, सुनसरी । 
कोरोना संक्रमित भएर आइसोलेसनमा बसेकाहरुलाई आइसोलेसनमै बसेकी ज्येष्ठ नागरिक वृद्धाले साइत अनुसार टीका लगाइदिएर आशिर्वाद दिएकी छिन् । 

टीका लगाइदिनका लागि इटहरी उपमहानगरकी उपमेयर लक्ष्मी गौतम र कोरोना नियन्त्रण तथा रोकथाम उपसमिति संयोजक वडा नम्बर ९ का वडाध्यक्ष भूपेन्द्र बरालले दहीमा मुछेको टीका, जमरा, मीठाई लिएर इटहरी आइसोलेसन पुगेका थिए । 


कोरोना संक्रमण भएपछि आइसोलेसनमा बसेका कतिपयमा दसैंजस्तो चाडबाडमा परिवारबाट अलग रहनु पर्दा न्याश्रो हुने, मानसिक तनाव व्यहोर्नु पर्ने भएकाले आत्मबल बढाउन, सान्तवना दिन टीका, जमरा र मिठाइ लिएर आइसोलेसन सेन्टर पुगेको उपमेयर गौतमले बताइन् । 

उनले भनिन्,’चाडबाडको बेला आइसोलेसनमा बस्नु भनेको कति पीडादायी हुन्छ ? त्यो त आइसोलेसनमा बस्नेलाई मात्र थाहा हुन्छ । उनीहरुको आत्मबल बढाउन जरुरी देखेर नै टीका लगाइदिने व्यवस्था गरिदिएको छ ।’ 

आइसोलेसनमा बस्दै आएकी ७८ वर्षीया वृद्धाले सबै संक्रमितहरुलाई टिका लगाइदिएकी थिइन् । आइसोलेसनमा बसेका २१ जनालाई उनले कोरोनालाई जितेर दीर्घायुको कामना गर्दै अबदेखि यस्तो अवस्थामा कहिल्यै पनि टीका लगाउनु नपरोस भन्ने आर्शिवाद दिएकी थिइन् । 

संक्रमितहरुले पनि दसैं जस्तो चाडबाडमा परिवारबाट छुटेर बस्‍नुपर्दा नराम्रो लागिरहेको बेला टीका जमराको व्यवस्था गरिदिएर दसैं ल्याइदिएको भन्दै संक्रमितहरुले खुशी भएर इटहरी उपमहानगरपालिकाका उपमेयर गौतमलाई धन्यवाद ज्ञापन गरे । 

कान्तिपुर दैनिक ।

.

प्रतिक्रीया दिनुहोस :

कमेन्ट गर्नुहोस

आफ्नो प्रतिक्रिया दिनुहोस् :

अघिल्लो समाचार अर्को समाचार
close
HTML tutorial