फ्रान्समा देशभरि लक डाउन, संक्रमणको दोश्रो लहर सुरु



प्रकाशित: कार्तिक १३, बिहिबार, एजेन्सी । 
कोरोना संक्रमणको दोस्रो लहर बढ्दै गएपछि फ्रान्स सरकारले देशभर दोस्रोपटक लकडाउन लागु गरेको छ । यो लकडाउन पूरै नोभेम्बर महिनासम्म रहने बताइएको छ ।

फ्रान्सका राष्ट्रपति इम्यानुयल म्याक्रोले राष्ट्रको नाममा सम्बोधन गर्दै शुक्रबारबाट लकडाउन लागु हुने जानकारी दिए । लकडाउन अवधिमा अत्यावश्यक कामबाहेक घर बाहिर निस्किन पाइने छैन । स्वास्थ्य क्षेत्र, स्कुल र उद्योग भने खुला रहने छन् । रेष्टुरेन्ट्स, बार जस्ता व्यवसाय बन्द रहने छन् ।

फ्रान्समा कोरोना संक्रमणका कारण हुने मृत्युको आँकडा अप्रिल महिनापछि सबैभन्दा उच्चस्तरमा पुगेको छ । मंगलबार मात्रै ३३ हजार नयाँ संक्रमित फेला परेका थिए ।राष्ट्रपति म्याक्रोले देशमा कोरोना संक्रमणको दोस्रो लहर खतराको स्तरमा पुगिसकेको बताउँदै यो पहिलेको भन्दा पनि खतरनाक हुनेमा कुनै शंका नरहेको बताए ।धेरै युरोपेली देशहरुमा हाल कोरोना संक्रमणको दोस्रो लहर तीव्ररुपमा बढ्दै गएको छ । 


धेरै देशहरुले रात्रिकालीन कर्फ्युको सामना गरिरहेका छन् । राष्ट्रको नाममा सम्बोधन गर्दै राष्ट्रपति म्याक्रोले महामारीलाई तुरुन्त रोक्नका लागि कठोर बन्नुपर्ने बताए । सम्बोधनको क्रममा म्याक्रोले फ्रान्सका अस्पतालका सबै आईसीयू बेड बिरामीले भरिएको जानकारी दिए ।यसअघि मार्च महिनामा पनि फ्रान्समा लकडाउन गरिएको थियो । 

राष्ट्रपति म्याक्रोले भनेका छन्, ‘मार्च महिनामा गरिएको सुरुवाती लकडाउनमा जस्तै घर बाहिर जाने अनुमतिका लागि अब एक फाराम भर्नुपर्ने छ । सामाजिक भेटघाटमा प्रतिबन्ध रहने छ । वसन्त ऋतुजस्तै केबल काममा जानका लागि, मेडिकल अपोइन्टमेन्टका लागि, आफन्तको मद्दतको लागि, अत्यावश्यक सामग्री खरिदका लागि वा बाहिरको ताजा हावा खानको लागि मात्र घरबाट निस्किन पाइने छ ।’

.

प्रतिक्रीया दिनुहोस :

कमेन्ट गर्नुहोस

आफ्नो प्रतिक्रिया दिनुहोस् :

अघिल्लो समाचार अर्को समाचार
close
HTML tutorial