हैदराबाद लाई पञ्जाब्ले १२ रन ले हरायो ।



प्रकाशित: कार्तिक ९, आईतबार, एजेन्सी । 
इन्डियन प्रिमियर लिग (आइपिएल) को ४३ औं खेलमा शनिबार सनराइजर्स हैदराबादमाथि किंग्स इलेभेन पन्जाबले १२ रनको नाटकीय जित हात पारेको छ ।

जितको लागि १ सय २७ रनको विजयी लक्ष्य पछ्याएको हैदराबादले १९.५ ओभरमा १ सय १४ रनमा अल आउट भएपछि पन्जाबले महत्वपूर्ण २ अंक हात पारेको हो । एक समय सहज जिततर्फ रहेको हैदराबाद अन्तिम ५ ओभरमा सम्हालिन नसक्दा पराजित हुन पुगेको हो ।

हैदराबादले अन्तिम १५ रन जोड्न ७ विकेट गुमाएपछि पराजित हुन पुगेको हो । हैदराबादलाई जितको लागि अन्तिम १२ बलमा १७ रन चाहिँएको थियो । १९ औं ओभरमा क्रिस जोर्डनले ३ रन खर्चेर २ विकेट लिएपछि खेल रोमान्चक बनेको थियो ।

अन्तिम ओभरमा हैदराबादलाई १४ रन चाहिँएको थियो । तर अर्शदीप सिंहले सुरुवाती ५ बलमा १ रन खर्चेर ३ विकेट लिदै महत्वपूर्ण जित पक्का गराए । पन्जाबलाई अन्तिम १८ बलमा २० रन बनाउन आवश्यक हुँदा हातमा ६ विकेट रहेको थियो । पन्जाबका बलरले उत्कृष्ट प्रर्दशन गर्दै महत्वपूर्ण जित पक्का गराए ।

हैदराबादलाई ओपनर डेभिड वार्नर र जोनी बेयरस्टोले ६.२ ओभरमा ५६ रनको साझेदारी गर्दै राम्रो सुरुवात दिलाएका थिए । सातौं ओभरको दोस्रो बलमा रबि बिश्रोईले वार्नरलाई ३५ रनमा कप्तान लोकेश राहुलबाट क्याच गराउँदै पहिलो सफलता दिलाए ।

वार्नरले २० बलमा ३ चौका र २ छक्का प्रहार गरे । आठौं ओभरको दोस्रो बलमा मुरुगन आश्विनले बेयरस्टोलाई १९ रनमा बोल्ड आउट गरे । बेयरस्टोले २० बलमा ४ चौका प्रहार गरे । मोहम्मद शामीले नवौं ओभरको पाँचौ बलमा अब्दुल सामदलाई ७ रनमा क्रिस जोर्डनलाई क्याच आउट गराएपछि पन्जाबको जितको आशा पलाएको थियो ।

१७ औं ओभरको पहिलो बलमा मनिष पान्डे १५ रनमा क्याच आउट भए । १८ औं ओभरको पाँचौ बलमा अर्शदीप सिंहले विजय शंकरलाई राहुलबाट २६ रनमा क्याच आउट गराएपछि खेल थप रोमान्चक बनेको थियो । शंकरले २७ बलमा ४ चौका प्रहार गरे ।

जेसन होल्डरलाई जोर्डनले १९ औं ओभरको तेस्रो बलमा ५ रनमा मनदीप सिंहबाट क्याच आउट गराएपछि थप रोमान्चक बनेको थियो । लगत्तै अर्को बलमा राशिद खान निकोलस पूरनबाट क्याच आउट भएपछि हैदराबादको सम्भावना कठिन बनेको थियो ।

मोहम्मद शामीले ४ ओभरा ३४ रन खर्चेर १ विकेट लिए । रबि बिश्रोईले ४ ओभरमा मात्र १३ रन खर्चेर १ विकेट लिएका थिए । क्रिस जोर्डनले ४ ओभरमा १७ रन खर्चेर ३ विकेट लिए । मुरुगन आश्विनले एक विकेट लिए । अर्शदीप सिंहले ३.५ ओभरमा २३ रन खर्चेर ३ विकेट लिए ।

त्यसअघि दुबई इन्टरनेशल क्रिकेट स्टेडियममा टस हारेर ब्याटिङ थालेको पन्जाबले २० ओभरमा ७ विकेटको क्षतिमा १ सय २६ रन बनाएको थियो। पन्जाबकानिकोलस पूरनले २८ बलमा २ चौका सहित सर्वाधिक ३२ रनको योगदान दिए ।

पन्जाबले पाँचौ ओभरको अन्तिम बलमा ओपनर मनदीप सिंहलाई १७ रनमा गुमाएको थियो । सन्दीप शर्माको बलमा राशिद खानबाट क्याच आउट हुनुअघि सिंहले १४ बलमा १ चौका प्रहार गरे । १० औं ओभरको अन्तिम बलमा आक्रामक ब्याट्सम्यान क्रिस गेललाई जेसन होल्डरले डेभिड वार्नरबाट लङअफमा २० रनमा क्याच आउट हुन पुगे । गेलले २० बलमा २ चौका र १ छक्का प्रहार गरे ।

११ औं ओभरको पहिलो बलमा कप्तान लोकेश राहुललाई राशिदले २७ रनमा बोल्ड आउट गरे । राहुलले २७ बलमा २ चौका र १ छक्का प्रहार गरे । लगातार खराब प्रर्दशन गर्दै आएका ग्लेन म्याक्सवेलले हैदराबादविरुद्ध पनि पन्जाबलाई निराश बनाउन पुगे ।

सन्दीपले म्याक्सवेललाई १४ औं ओभरको चौथो बलमा १२ रनमा क्याच आउट गराएपछि पन्जाब समस्यामा परेको थियो । १५ औं ओभरको दोस्रो बलमा दीपक हुडालाई राशिदले शून्यमा स्टम्पिङ आउट गराए ।

जेसन होल्डरले ४ ओभरमा २७ रन खर्चेर २ विकेट लिए । राशिद खानले ४ ओभरमा १४ रन खर्चेर २ विकेट लिए । सन्दीप शर्माले ४ ओभरमा २९ रन खर्चेर २ विकेट हात पारे । पन्जाबले अब सोमबार कोलकाता नाइट राइडर्ससँग खेल्ने छ । हैदराबादले मंगलबार दिल्ली क्यापिटल्ससँग खेल्ने छ ।

.

प्रतिक्रीया दिनुहोस :

कमेन्ट गर्नुहोस

आफ्नो प्रतिक्रिया दिनुहोस् :

अघिल्लो समाचार अर्को समाचार