नेपाली फुटबल टोलीको बन्द प्रशिक्षण सुरु: विश्वकप


काठमाडौँ
– कतारमा हुने फिफा विश्वकप २०२२ छनोट तथा चीनमा हुने एएफसी एसियन कप २०२३ छनोटका लागि नेपाली फुटबल टोलीको बन्द प्रशिक्षण सुरु भएको छ ।

सातदोबाटोस्थित एन्फा मैदानमा पहिलो दिनको पहिलो सिफ्ट आइतबार बिहान ९ बजे सुरु भएको हो ।

सय दिनभन्दा लामो समयसम्म अभ्यास गर्ने गरी एन्फाले नेपाली टोलीको अभ्यास सुरु गरेको हो । चैतमा हुने विश्वकप छनोट अन्तर्गत घरेलु मैदानमा हुने खेलका लागि मुख्य प्रशिक्षक बालगोपाल महर्जनले ५८ जनालाई अभ्यासमा बोलाएका छन् ।

तीमध्ये केही खेलाडी सम्पर्कमा आउन बाँकी रहेको र अधिकाशं खेलाडीले क्याम्पमा सहभागि भइसकेका छन् । नेपालले चैत १२ गते चाइनिज ताइपेइ र ३० गते अस्ट्रेलियासँग ३० गते काठमाडौँस्थित दशरथ रंगशालामा हुनेछ । गएको शुक्रबार मात्रै एएफसीले खेल तालिका सार्वजनिक गरेसँगै नेपाली टोली अभ्यासमा जुटेको हो ।

यसअघि विश्वकप छनोटका ५ खेल खेलेको नेपालले आफ्नो पक्षमा नतिजा हात पार्न सकेको छैन । जसमध्ये एक खेलमा जित हात पार्दै ३ अंक जोडेको छ ।

मुख्य प्रशिक्षक महर्जनले ५८ खेलाडी बोलाउँदा संख्यात्मक हिसाबले धेरै भएको संकेत गर्दै राम्रो टिम बनाउन धेरै खेलाडी बोलाइएको प्रष्ट पारेका छन् । उनले भने, ‘अहिले क्याम्पमा ५८ जना किन भन्नु होला कोरोना महामारीले गर्दा सिर्जना गरेको समस्या जुन बंगलादेशसँगको खेलमा देखियो खेलाडी अभाव त्यस्तो नहोस् भनेर भन्ने उदेश्यले धेरै खेलाडी बोलाइएको हो । पहिलो, दोस्रो, तेस्रो र फाइनल फेज गरी चरणबद्ध रुपमा खेलाडी छनोट गर्ने योजना छ ।’

राम्रो नतिजाको अपेक्षा
नेपाली फुटबल टोलीले दशरथ रंगशालामा नखेलेको पनि ५ बर्षभन्दा बढी भइसकेको छ । अन्तिम पटक नेपालले दशरथ रंगशालामा सन् २०१८ विश्वकप छनोट अन्तर्गतको भारतसँग २०१५ मा खेलेको थियो ।

त्यसयता अब चाइनिज ताइपेइसँगको घरेलु खेल भए त्यो नै रंगशाला पुनर्निर्माण पछिको पहिलो खेल हुनेछ । नेपाली समर्थकको साथ, घरेलु मैदान र यहाँको मौसमले नेपाली टोलीका लागि सकारात्क प्रभाव पार्नेछ । लामो समयको कोरोना भाइरसको महामारीपछि धेरै खेलाडीहरु पहिलो पटक अभ्यासमा जुटेका छन् ।

यसअघि कार्तिक महिनामा नेपाली टोलीले बंगलादेशसँग दुई मैत्रिपूर्ण फुटबल खेल खेलेको छ । जसमा एक खेल बराबरी खेल्दा एक खेलमा हार व्यहोरेको छ । कोरोना भाइरसका कारण खेलाडीहरु झण्डै ८ महिना खेलकुद गतिविधि विहीन भएर घरमा बसेका थिए । तर, बंगलादेशसँग खेल्दा नेपाली टोलीका खेलाडीहरुमा फिटनेसको समस्या देखिएको थियो । तर, अहिले त्यो समस्या र यसअघिका कमिकमजोरी कमगर्ने उद्देश्य रहेको महर्जनले बताए ।

‘घरेलु दर्शकसामु लामो समयपछि हामी खेल्नेछौं । त्यसका लागि तयारीको समय सय दिनभन्दा बढी छ । त्यसै अनुसार अभ्यास गर्ने छौं,’ महर्जनले भने ।

मैत्रिपूर्ण फुटबलका लागि एन्फासँग आग्रह
विश्वकप छनोटसम्मका लागि कार्यबाहक प्रशिक्षकको जिम्मा पाएका महर्जनले एन्फासँग मैत्रिपूर्ण खेलको प्रस्ताव गरेको बताएका छन् ।

उनले नेपालले घरेलु मैदानमा खेल्ने भएकाले काठमाडौँमै केही टोलीलाई बोलाइ मैत्रिपूर्ण फुटबल खेल्दा राम्रो हुने भन्दै एन्फालाई त्यसको व्यवस्थापनका लागि आग्रह गरेको बताएका छन् ।

‘मैले मैत्रिपूर्ण खेलका लागि निवेदन गरेको छु । त्यसका लागि सबैको साथको अपेक्षा गरेको छु,’ प्रशिक्षक महर्जनले भने ।

चुनौति बढी
राष्ट्रिय टोलीले अभ्यास सुरु गरिरहँदा ५८ जना खेलाडीमध्ये ११ जना खेलाडी छान्न अहिले निकै समस्या पर्ने फुटबल जानकारहरु बताउँछन् । मुख्य प्रशिक्षकका लागि दुई वर्षको सम्झौतासहित नेपाल आएका स्वीडिस नागरिक योहान कालिनले पदबाट राजीनामा दिएका छन् । उनै कालिनको जिम्मेवारी अहिले महर्जनको काँधमा आएको छ ।

महर्जनले बंगलादेशसँगका दुई मैत्रिपूर्ण खेलमा मुख्य प्रशिक्षक भएर काम गरे । जसमा कालिनको पनि साथ थियो । त्यसमा नेपालले राम्रो गर्न सकेन । बंगलादेशसँग सँधै हावी हुँदै आएको नेपालले मिश्रित नतिजा निकाल्यो ।

अब महर्जन आफैँले खेलाडी कल गरेका छन् । उनले गएको वर्षको शहीद स्मारक ए डिभिजन लिगमा खेलाडीको प्रदर्शनलाई आधार मान्दै बन्द प्रशिक्षणमा बोलाएको बताएका छन् । तर, लिग सकिएको १० महिनापछि पुरानो खेलको मुल्याङ्कनका आधारमा बोलाइएका खेलाडीले राम्रो गर्न सक्लान् भन्ने प्रश्न महर्जनका लागि चुनौति छ ।

त्यसो त, नेपाली फुटबलमा उमेर समुहमा उनै महर्जनले प्रशिक्षण दिएका धेरै खेलाडी अहिले राष्ट्रिय टोलीको बन्द प्रशिक्षणमा छन् । त्यसले पनि उनलाई केही सहज हुने देखिन्छ । उमेर समूहमा महर्जन पनि सफल प्रशिक्षकका रुपमा चिनिन्छन् ।

.

प्रतिक्रीया दिनुहोस :

कमेन्ट गर्नुहोस

आफ्नो प्रतिक्रिया दिनुहोस् :

अघिल्लो समाचार अर्को समाचार
close
HTML tutorial