छ महिनामा ३१ प्रतिशत मात्र खर्च



भक्तपुर ।
चाँगुनारायण नगरपालिकाले आर्थिक वर्ष २०७७/७८ को छ महिनामा कुल बजेटको ३१ दशमलव ४३ प्रतिशत बजेट मात्रै खर्च गरेको छ । आव २०७७/७८ को अर्धवार्षिक समीक्षामा सुरु गर्दै नगरपालिकाको आठौँ नगरसभामा सो जानकारी दिइएको हो ।

सोमबारबाट सुरुवात भएको नगरसभामा नगर प्रमुख सोमप्रसाद मिश्रले बजेट विनियोजनतर्फ प्रगति कमजोर भएको बताए । उनले कोभिड–१९ का कारण आवको छ महिनामा लक्ष्यअनुरुप प्रगति हासिल गर्न नसकेको जानकारी दिए । उनले बाँकी छ महिनालाई लक्ष्य हासिल गर्ने उद्देश्यअनुरुप कार्यक्रम अगाडि बढाउने तय भएको बताए ।

कार्यक्रममा उपप्रमुख बिना बास्तोलाले चालु आवको अर्धवार्षिक समीक्षा प्रतिवेदन प्रस्तुत गर्दै चालु आवमा कुल रु एक अर्ब ४८ करोड २७ लाख तीन हजार ६ सय विनियोजन गरे पनि रु ४६ करोड ६० लाख ४६ हजार ५ सय खर्च भएको उल्लेख गरिन् । यसमा पूँजीगततर्फ रु ८१ करोड २५ लाख ९० हजार बजेट विनियोजन गरिएकामा हालसम्म रु २४ करोड ४६ लाख ७५ हजार ६ सय २४ खर्च भएको छ ।

उनले कुल बजेटको चालुतर्फ रु ६७ करोड एक लाख १३ हजार ६ सय बजेट विनियोजन गरेकामा रु २२ करोड १३ लाख ७० हजार ८ सय १७ अर्थात् ३३ दशमलव तीन प्रतिशत रकम खर्च भएको छ । नगरपालिकाले चालु आवमा रु २८ करोड ७१ लाख ६० हजार राजश्व सङ्कलन गर्ने प्रक्षेपण गरिएकामा रु सात करोड २६ लाख ७६ हजार ८ सय ४४ अर्थात् २५ दशमलव ३० प्रतिशतमात्रै लक्ष्य हासिल गरेको छ ।

नगरपालिकाले शिक्षा, युवा तथा खेलकुद विकासअन्तर्गत कुल रु तीन करोड २८ लाख ७० हजार बजेट विनियोजन गरेकामा रु १८ लाख ४६ हजार ४५ अर्थात् पाँच दशमलव ६० प्रतिशतमात्रै खर्च भएको छ । स्वास्थ्यतर्फ नगरपालिकाले रु तीन करोड ३५ लाख बजेट विनियोजन गरेकामा छ महिनाको अवधिमा जम्मा रु १७ लाख ९४ हजार ९ सय ६३ अर्थात् पाँच दशमलव ३० प्रतिशत खर्च भएको छ ।

महिला, बालबालिका तथा ज्येष्ठ नागरिकतर्फ रु एक करोड ६० लाख ३० हजार बजेट विनियोजन गरेकामा रु चार लाख ८० हजारमात्रै खर्च गरेको छ । नगरपालिकाले सामाजिक सुरक्षातर्फ रु १२ करोड ६० लाख रकम विनियोजन गरेकामा रु चार करोड १९ लाख ७२ हजार १ सय ३९ मात्रै खर्च गरेको छ ।

पशुपक्षी प्रवर्द्धनतर्फ नगरपालिकाले कुल रु ७६ लाख ६२ हजार रकम विनियोजन गरेकामा रु आठ लाख २८ हजार २ सय ५२ खर्च गरेको र कृषि विकासतर्फ रु एक करोड ९७ लाख विनियोजन गरेकामा रु १५ लाख नौ हजार ८ सय ७० अर्थात् सात दशमदलव ६६ खर्च गरेको छ ।

नगरपालिकाले सूचना प्रविधितर्फ रु एक करोड ६२ लाख बजेट राखेकामा रु २७ लाख ९६ हजार अर्थात् १७ दशमलव २६ प्रतिशत, आयुर्वेदतर्फ रु १२ लाख ४५ हजार बजेट राखेकामा रु चार लाख ९६ हजार मात्रै खर्च गरेको छ ।

नगरसभामा प्रस्तुत प्रतिवेदनअनुसार सहकारी प्रवर्द्धन, उद्यमशीलता विकास कार्यक्रम तथा गरिबी निवारण कार्यक्रम, विपद् व्यवस्थापन, पूर्ण सरसफाइ ताथ बास कार्यक्रमलाई प्रभावकारी बनाउने प्रयास गरिरहेको उपप्रमुख बास्तोलाले जानकारी दिइन् ।

.

प्रतिक्रीया दिनुहोस :

कमेन्ट गर्नुहोस

आफ्नो प्रतिक्रिया दिनुहोस् :

अघिल्लो समाचार अर्को समाचार
close
HTML tutorial